Ministri i Shëndetësisë, Arben Vitia, në një konferencë për media ka bërë të ditur se shpejti do të filloj vaksinimi me vaksinën HPV për djemtë, vaksinë që ndihmon në parandalimin e shumë llojeve të kancereve.

Ai theksoi se vaksinimi për vajzat ka nisur vitin e kaluar dhe deri më tani me këtë vaksinë janë vaksinuar 10 mijë vajza, raporton Arbresh.info “Sot është një ditë e rëndësishme për shëndetin e fëmijëve dhe zhvillimin e politikave shëndetësore.

Ky është një hap i madh drejt parandalimit të sëmundjeve serioze.

Virusi HPV shkakton shumë probleme dhe është shkaktar i shumë llojeve të kancereve. Vitin e kaluar miratuam përfshirjen e tri vaksinave të reja në kalendarin e fëmijëve.

Kjo nuk është vetëm një mundësi për vajzat, por edhe për djemtë, duke ofruar mbrojtje kundër sëmundjeve serioze.
HPV është një virus shumë i rrezikshëm dhe vaksinimi i djemve është një hap shumë i domosdoshëm,” tha Vitia.

Ai shtoi se vaksinimi është i nevojshëm për të rinjtë, pa marrë parasysh gjininë. “Deri më tani, 10 mijë vajza nga grupi i synuar janë vaksinuar.

Vaksinimi i të rinjve, për të dyja gjinitë, është shumë i domosdoshëm,” tha ai./Arbresh.info